Aksioni i sotëm policor, fillimisht për ndalimin e hyrjes së Marko Gjuriqit, shefit të së ashtuquajturës Zyrë për Kosovën në Qeverinë e Serbisë, dhe të Aleksandar Vulinit, Ministër i Mbrojtjes së Serbisë, e më pas edhe arrestimit të Gjuriqit pas hyrjes në Kosovë, ka qenë i koordinuar në vazhdimësi me Kryeministrin e Kosovës, Ramush Haradinaj.

Kështu së paku i është thënë jozyrtarisht portalit Koha.net nga kabineti i kryeministrit.

Po ashtu, Koha.net mëson se për këtë ngjarje, Zyra për Informim e Kryeministrit nuk pritet të dalë me një qëndrim zyrtar, pasi konsideron se deklarata e Zëvendëskryeministrit Behgjet Pacolli ka qenë e mjaftueshme për sa i përket qëndrimit të Qeverisë.

Pacolli ndërkaq, pas aksionit, deklaroi se Policia e Kosovës ka vepruar sipas ligjit të vendit tonë.

“Në Veri të Mitrovicës ka arrestuar Z. Gjuriq. Tani mbas kalimit të të gjitha procedurave, është duke u bërë e mundur deportimi i tij jashtë Republikës së Kosovës. Atij u është tërhequr vërejtja disa herë që t’i respekton ligjet e Kosovës, siç duhet respektuar ligjet e nikoqirit, çdo qytetar, kudo që shkon”, ka thënë Pacolli.

Kurse deputeti i AAK-së, Muharrem Nitaj, në një postim në Facebook, ka thënë se nuk po arrin të kuptojë aksionin e sotëm policor.

“Po mundohem ta kuptoj atë që ndodhi sot në Mitrovicë, e s’po muj i bi në fije. Mu duk sinjifikative një deklaratë e Pacollit, e thënë disa orë para arrestimit të Gjuriqit se ai nuk ka leje dhe nëse hyn në Kosovë, do të arrestohet! Ishalla është siç po kujtojnë shumica, por seç e kam një dyshim për gjithë këtë ngjarje”, ka deklaruar Nitaj.

Kurse Pal Lekaj, ministër i Infrastrukturës, për mediat ka thënë se vendimi për ndalimin e hyrjes së Gjuriqit dhe Vulinit, e më pas edhe arrestimit të Gjuriqit, ka qenë i koordinuar me Kryeministrin Haradinaj.